گجرات اسمبلی نے یو سی سی بل منظور کر لیا

امت شاہ نے اس موقع پر گجرات کے وزیر اعلیٰ بھوپندر پٹیل اور بل کی حمایت کرنے والے تمام ارکان اسمبلی کو مبارکباد بھی پیش کی۔اطلاعات کے مطابق، گجرات اسمبلی میں اس بل پر تقریباً ساڑھے سات گھنٹے تک بحث جاری رہی، جس کے بعد اسے ووٹنگ کے لیے پیش کیا گیا اور اکثریت سے منظور کر لیا گیا۔ ووٹنگ کے دوران اہم اپوزیشن جماعت کانگریس نے ایوان سے واک آؤٹ کیا۔ اس سے قبل وزیر اعلیٰ بھوپندر پٹیل نے یہ بل اسمبلی میں پیش کیا تھا، جبکہ اس کا مسودہ تیار کرنے کے لیے ریٹائرڈ جج رنجن دیسائی کی سربراہی میں ایک کمیٹی تشکیل دی گئی تھی۔

گجرات اس قانون کو نافذ کرنے والی ملک کی دوسری ریاست بن گئی ہے۔ اس سے پہلے فروری 2024 میں اتراکھنڈ نے یو سی سی بل کو منظور کیا تھا۔ نئے قانون کے تحت ریاست میں یکساں سول قوانین لاگو ہوں گے، تاہم کچھ مخصوص طبقات، خصوصاً درج فہرست قبائل اور وہ گروہ جن کے روایتی حقوق آئینی تحفظ رکھتے ہیں، اس کے دائرے سے مستثنیٰ رکھے گئے ہیں۔حکومت کا کہنا ہے کہ اس قانون کا مقصد تمام شہریوں کو مساوی قانونی حقوق فراہم کرنا اور ایک متحد قانونی نظام قائم کرنا ہے، جبکہ ناقدین کی جانب سے اس پر مختلف سوالات بھی اٹھائے جا رہے ہیں۔