جبلپور:مدھیہ پردیش کے جبل پور میں برگی ڈیم کے قریب پل کی تعمیر میں مصروف مزدوروں نے کروز جہاز کو الٹتے دیکھ کر اپنی جان کی پرواہ کیے بغیر تیز لہروں میں چھلانگ لگا دی اور تقریباً 16 سے 17 افراد کو موت کے منہ سے بچا لیا جن میں رمضان بھی شامل ہے جس نے اکیلے چار لوگوں کی جان بچائی۔ ان لوگوں نے ایک پل کیلئے بھی یہ نہیں سوچا کہ لہریں انہیں بھی اپنی آغوش میں لے سکتی ہیں۔ انہوں نے کروز جہاز کے الٹتے ہوئے ہولناک منظر کو دیکھا۔ لوگوں کی چیخیں سن کر وہ ایک لمحے کیلئے بھی نہ ہچکچائے اور برگی ڈیم میں چھلانگ لگا دی۔ ریسکیو ٹیم حادثہ کے دو گھنٹے بعد پہنچی۔ جب ان مزدوروں نے کروز جہاز کو ڈوبتے دیکھا تو اپنی جانوں کی پرواہ نہ کرتے ہوئے وسائل کی کمی کے باوجود ریسکیو اور ریلیف آپریشن شروع کر دیا۔ ان مزدوروں نے جہاز میں سوار 16 سے 17 افراد کی جان بچائی۔ ان کے علاوہ مزید چار افراد کو نکالا لیکن وہ پہلے ہی دم توڑ چکے تھے۔
