Ammi Ayesha (r.a) Qaseeda | Anas Younus

Sallalla Sallalla Salle Ala Mohammadin
Sallalla Sallalla Salle Ala Mohammadin

Nabuwat ka chaman hai ye gulistan hai risalat hai
Khizan ho ya koi tufan ise rab ki hifazat hai

Ae logo ho agar seene me dil bebakiyon wala
Sunata hun tumhen qissah bahut ghamnakiyon wala

Zameen me dard par jab chha raha tha aasmaan-e-gham
Ye ammi ayesha (r.a) par zulm ki hai dastan-e-gham

Nabi (saw) ki pyari zauja ka hua nadhal kandha tha
Munafiq bin ubai ne un pe ek bohtan bandha tha

Ye shaban-ul-moazzam panch hijri ka zamana tha
Qareebe najd ladne ke liye logo ne jaana tha

Munafiq jante the is jagah par jang na hogi
Aman wali jagah hai ham pe bilkul tang na hogi

Ladai se ye ghabrate the duniya thi inhen marghub
Riwayat hai ke is ghazwah marisiya me munafiq khub

Nikala mustafa ne qurah sab azwaj ka jis dam
To hazrat ayesha(r.a) apne muhammad ke huin hamdam

Khushi se dil machalne lag gaya shayeq hua tanman
Safar ke waste tayyariyan karne lagin fauran

Idhar Asma ka pahna haar aur makhmal me aa baithin
Udhar khushiyan hi khishiyan Ayesha ke dil me aa baithin

Safar se wapsi par qaflah raat ek jagah thahra
Isi khamosh manzar me chhupa tha ek asar gahra

Gayin thin Ayesha jab rafa hajat ko magar aa kar
Pareshan ho gain apne gale me haar na pa kar

Idhar ye justju-e-haar ke thin ranj ke mare
Udhar woh qafile wale rawana ho gye sare

Talash-e-haar me siddiqah ne wo haar to paya
Magar jab aayin wapas to wahan sannata tha chhaya

Khuda ki shan peechhe aa rahe then hazrate safwan (r.a)
Qareeb aa kar jo dekha Ayesha ko ho gaye hairan

Ye baithin oont par unke wo paidal chal pare lekar
The dil bhi saaf aur pakeezgi ke dono then paikar

Bahut hi jald apne qafile se ja mile dono
Munafiq bin ubai ko ye khatakne lag gaye dono

Kiya na tha ye wahashatnaak nazara madine me
Diya ilzam amma Ayesha ko us kameene ne

Munafiq sab madine me ye phailane lage qissah
Jo jitna tha bura utna hi lene lag gaya hissah

Abhi tak paak siddiqah ko kuchh maaloom hi na tha
Ye to maasoom thin par dushmanon ke dil me keena tha

Sahaba is khabar par ungliyan kaano me rakhte then
Munafiq badchalan lekin yahi bohtaan bakte then

Suna ek din ye qissah umme mestah ki zabani jab
To lautin Ayesha ghar ulte paaon kaam bhoolin sab

Yaqeen ab bhi inhen na tha magar ye aa gayeen maike
Sisakti Ayesha ne maa ka daman thama yahan aake

Magar maa ne faqat taskeen di kuchh bol na paayin
Achanak unke darwaze pe ek Ansariya aayin

Jo dekha Ayesha usne sara qissah dohraya
Ye sun kar paaon larze Ayesha ke sar bhi chkraya

Nahin nazuk koi shai ‘izzat-o-namoos jaisi hai
Ye chaknachoor ho jane me ek fanoos jaisi hai

Ghamon se bhar gaya tha seena dil bhi para para tha
Faqat tanhaai ka daman tha aansoo ka sahara tha

Zikr kartin hain ammi Ayesha ye almiyah hamse
Ke aankhen khushk meri ho gayin ro ro is gham se

Sallalla Sallalla Salle Ala Mohammadin
Sallalla Sallalla Salle Ala Mohammadin

Phir ek din aa gaye sarkar-e-do’alam mere ghar par
Kaha jab mujhko dekha ghamzadah hun apne bistar par

Agar mujrim ho taubah kar lo Allah maaf kar dega
Agar mujrim nahin ho tum to phir quran utrega

Ye sun kar ho gaya haasil mujhe ek itminaan-e-dil
Sukoon se ho gaya labrez ab mera makan-e-dil

Kaha maine ke mera haal hai Yaqoob ke jaisa
Qarar-e-dil mujhe deta hai ab sabr-e-jameel jaisa

Achanak ho gayi pyare nabi par kaifiyat taari
Bara’at par meri hone laga ailan-e-rab jari

Utari rab ne das ayaat meri paakbazi par
Ghazab rab ka hua fittin ki dushnaam saazi par

Rahin siddiqah paakizah hue badnam sab ashrar
Hua tha haar jiska gum gaye dushaman usi ke haar

Koi apnne liye bhi maa ki gaali sah nahi sakta
Ho tohmat umme ummat par to mai chup rah nahin sakta

Are kuchh soch to lete ke karne jaa rahe ho kya
Kisi maasoom ko tarpa ke akhir paa rahe ho kiya

Abhi to khelne ke din the wo 14 baras ki thi
Shahe maasum ke hamrah roti our hansti thi

Banine Ayesha aao banate Ayesha aao
Jo naar-e-dushamani me jal rahen hain unko samjhao

Ae umm-ul-momneen dushamanon ilam ke a’ada
Abhi aulad amma Ayesha ki rooh hai zindah

Na chhero apne hathkando se ab bhi baaz aa jao
Ye be taqeeq hai dushanaam sazi is se katraao

Samajhta jo nahin shaitan ki chalon me phansta hai
Ye dekho kis qadar iblees bhi ham sab pe hansta hai

Hame apas me ladwa kar hamara kar diya nuqsan
Usi ki chal hai insan ko tadpa rha insan

Darudon ka hamari taraf se hadiya Muhammad ko
Salamon ka hamari taraf se tohfah Muhammad ko

Sahaba par bhi unke khuda ki rahmaten nazil
Ho pyari ummahat-ul-momneen par barqaten nazil

Musalmanon ki maa hun mai magar Siddiq (ra) ki beti
Kabhi Siddiq ki aaghosh me leti kabhi baithi

Mere sartaj ne kul zindagi rakha tha paas uska
Mai beti jiski hun pahna frishton ne libas uska

Muhammad ke Abu Bakr-o-Umar (r.a) majnoon hain dono
Mere ghar me Abu Bakr-o-Umar (r.a) madfoon hain dono

Meri paakizah koi ko samajhna khub aasaan hai
Laga lo is se andazah mera damad usma (r.d) hai

Ae tohmat dene walon sarwar-e-konain se poochho
Ali aur Fatma se poochh lo Hasnain se poochho

AbuBakr-o-Umar, Usmaan-o-Haidar, Fatma, Hasnain
Meri ‘asmat pe to shahid hai rabbe shah zulqurnain

Andhera hi andhera hai jo batil ka ujala hai
Khuda ki taraf se tai hai ke haq ka bol bala hai

Salame bint siddiq-e-rafiq-e-shah noorani
Salame zouja-e-mahbooba-e-mahboob rabbani

Salame Fatma ke pyare pyare baap ki raani
Salame Mustafa ke ladle Hasnain ki naani

Ye mere chand aansoon hain hifazat inki kar lena
Ae mere bhaaiyon bahnon sharakat inki kar lena

Ilahi is nazam se har kisi ke dil ko garma de
Osama aur Anas ke dard dil ko aam farma de

Sallalla Sallalla Salle Ala Mohammadin
Sallalla Sallalla Salle Ala Mohammadin